Моайнас кӣмьн баяс

Ля̄йй эфт о̄ллмасьт шӯрр кӣммьн. Ка̄ллесь, ко̄ххт ёадтсэлэшкуадт мя̄һца, кӯль шылле, мӯрэ гоаррэ ва̄ррэ – пуадт ке̄ммна я каджь со̄нэсьт: »Ко̄ххт пэря лыһкэ, мӣ вуайй ва̄ресьт вуасста пуэдтӭ? Манҍтэ пӣдтҍ шаннт ва̄ресьт?« Ка̄ллсэсьт ля̄йй пӣрас: а̄ка я мо̄джесь нӣййт. Ӣлленҍ, ӣлленҍ сыйй я нӣййт элькэ кэ̄джьтэдтэ нымьп сыййта, касьт лӣ руэнньса е̄лле. Эйй по̄р, нюэзельт вуадт, пай олкэс кя̄һч. Аджесь са̄ррн со̄нэнҍ; »Мэ̄ййт, нӣйтням, эгк ля̄ ве̄ссель? Мэ̄нн баяс юртак?« Нӣййт са̄ррн эженӭсь: »Мунн шэ̄ннҍтэ шӯрр, адтҍ та̄та кӯйе выйтэ. А касьт мунн коавна па̄рьн, ко̄нн мунн шоабпша?« Аджесь са̄ррн: »То̄нн кӣҏш вя̄л эйй кугкь а̄ййке.« Э ӣджь юррт: »Мунн кӣмьнэнҍ, шӯрр кӣмьнэнҍ соарнсаста.«

Е̄кьнэнч пӯдӭ, аджесь вӯлькэ кӣмьнэнҍ соарнънэ: »Кӣммьн, то̄нн, кӣммьн, то̄нн мун югке вуэр куллтэллэкь я ве̄кьхэллекь мыннӭ. Адтҍ мунэсьт лӣ шӯрр пӣдтҍ.« Кӣммьн каджь: »Мӣ тоннӭ шэ̄нтэ?« – Мыннӭ эйй шэ̄ннтэнч нимӣ. Мун нӣййт пэчксэлант, кэпшсэлант, элля руэняс соннӭ ва̄ррь моазэсьт е̄лле. Поаллтлэнне мӣнэгуэйм шӯрр я̄вьр тӯгкенҍ лӣ сыййт, касьт нӯрраш ве̄ссьлэнне е̄ллев. Эгк вуайче ко то̄нн тэнн сыйт ыгка ке̄ссе мӣн е̄ллем сайе? Кӣммьн са̄ррн: »Тэдта элля ло̄ссесь лыһк. Мунн тэнн то̄н кэ̄джьмуж ӣллькъя.« Куэдӭсьт вуадтъенҍ, ля̄йй цӣгк ыйй. Кӣммьн чо̄ннкӯдӭ пэйель куэӆьц я мэ̄нэ тэнн сыййта, касьт нӯрраш сӣрр пэр, тэсьт нюччкенҍ я сӣрренҍ. Кӣммьн мӣлкнесьт ке̄сськӯдӭ тэнн пэр, т, касьт нӯраш сӣрэ, тэнн гоаррэ, касьт нӣййта эйй ле̄ннч руэняс е̄лле. Па̄ррнэ нюччкенҍ, сӣрренҍ, олкэс выййтэнҍ: ев тӣдҍ, касьт сыййт ля̄йй. Куэррьев чуэннчев тэйт шэ сэенҍ, нӯтҍ рынтэсьт оаллкэнҍ лоабпэв, тэсьт са̄ййм ле̄в коадзэнч олк альн. Эйй кӯһкень ка̄ллса пэҏт луннҍ оарр. Ка̄ллса ӣнца цоаввн нӣйтэсь: »Адтҍ то̄нн мэ̄н, томтэслувв сӣрьегуэйм. Нӣййт пӯдӭ, суаӈэ сӣррэм пэ̄ҏьтэ. Па̄ррнэ я нӣйт вэлльенҍ соннӭ вуэсста, тӣрвхэдтэв, со̄нэсьт нэ̄м кэ̄джев. Ныдтҍ, ка̄ллса, агка нӣййт томтэслувэ тэйе е̄лльегуэйм, койт кӣммьн кӣзе ыгка тэнн пэҏт луз. Маӈӈа нӣййт коавнэ
ӣджяс мо̄джесь па̄рьн, я сыйй ноајјтлэдтэнҍ. Е̄лешкудтэнҍ руэнньсэнне. Сӣнэнҍ шэ̄ннҍтэнҍ па̄ррнэ. О̄дт сыйтэсьт эллькэнҍ е̄лле. Пукэнҍ ля̄йй лыһк, пугк е̄лешкудтэнҍ пуэраст.
А ка̄ллесь пӯдӭ ке̄ммна, па̄ссьпужэ я вя̄л пэрямп элькэ пынне кӣмьн. Моайнас пугк.

Яковлев Мыдтҍре Ла̄зэр

Популярные сообщения из этого блога

Семилетний стрелок из лука

Саам - богатырь

Гирвас - озеро