Ко̄ххт Иммель энҍтэ ноавьтэтҍ чӯрьвэтҍ я пӣльетҍ

Сэ̄ррв пӯдӭ Иммьле я са̄ррн: »Анҍт мыннӭ шӯрр чӯрьвэтҍ ко̄ммьтэсь лоабпэгуэйм я са̄рркмэгуэйм.« Иммель энҍтэ соннӭ шӯрр мо̄джесь чӯрьвэтҍ. Сэ̄ррв кэ̄же Иммьлесьт кугкесь
пӣльетҍ, штобэ пуэраст куллэ. Иммель энҍтэ соннӭ кугкесь пӣльетҍ.
Пӯдзъе Иммель энҍтэ эйй шӯрр пӣльетҍ я мо̄джесь са̄ррк чӯрьвэтҍ я оанҍхэсь пӣдчна, гӯ сэрвэсьт. Иммель энҍтэ пӯдзъе югке – налшэм сэксмэтҍ: вӣллькэсь, чоаһпесь, руччкесь,
кыррьй.

Нюэммель пӯдӭ, кэ̄же Иммьлесьт шӯрр чӯрьвэть, манҍтэ сэрвэсьт ле̄в. Иммель энҍтэ соннӭ шӯрр чӯрьвэтҍ, я нюэммьля каррэль сӣнэтҍ кӣһчлэнҍт. Карр, вусьт мӯрэ пашшнант, ёрэ
шӯрр чӯрьвэгуэйм, по̄нншадт, пэ̄ййнэ эйй вуэй. Иммель уййн, штэ нюэммель эйй вуэјт сӣнэгуэйм шӣӆкхуввэ я са̄ррн: »Нюэммель, эйй быдтӭ тоннӭ шӯрр чӯрьвэтҍ. Мунн тоннӭ анта
кугкесь кулльесь пӣльетҍ. Тэгк лӣннченҍ пэрямп, мэ̄нн шӯрр чуэрьв.« Ныдтҍ нюэммель элькэ е̄лле кугкесь пӣльегуэйм, оанҍхэсь пӣджьнэнҍ, удлэсс ю̄лькэгуэйм, вӣллькэсь вӯгкесь
сэксмэнҍ та̄лльва я ке̄ссь па̄ль се̄ра сэксмэнҍ. Моайнас пугк.

Яковлев Мыдтҍре Ла̄зэр

Популярные сообщения из этого блога

Семилетний стрелок из лука

Саам - богатырь

Гирвас - озеро