Моайнас рӣмьн я ко̄рк баяс

Рӣммьн я ко̄ррк вуэсстлэннҍтэнҍ шӯрр ла̄мьп альн. Ко̄ррк ля̄йй се̄ннтэнч рӣмьн э̄л. Рӣммьн ко̄ркэсьт я мудта ло̄нҍтэнҍ по̄рэнҍт мэнӭтҍ, удць алкатҍ. Ко̄ррк тэнн гуэйкэ тувэ рӣмьн
вуэпьсэ. Ко̄ррк я са̄ррн: »Рӣммьн, та̄так то̄нн мун се̄льк альн кырьтсе? Мунн то̄н ма̄тҍха кыррьтэ.« Рӣммьн са̄ррн: »Мунн тула та̄һтэ кыррьтэ то̄н ка̄вьр альн.« Ко̄ррк са̄ррн; »Нюам
мыннӭ се̄льк э̄л, кӯһт ке̄бпель пый пырр ча̄пэх, кӯһт маӈӈь ке̄бплэтҍ пый кудтҍ пя̄лла пэдташ, э се̄ййп анҍ пруткшуввант маӈем пе̄льт.
« Рӣммьн оаштэ ыштэ ко̄рк ка̄вьр э̄л, ко̄ххт ко̄ррк
па̄кэ со̄ннӭ ышштэ. Ко̄ррк кыррьтэль, пэ̄йенҍт вӯссьт ва̄рь э̄л, поакэ рӣммьнэ нюччкъе. Рӣммьн кэдче вэлас, вусьт поаввьнэ, оарр эйй лыгкэнҍт. Ко̄ррк кырьтэ пырр рӣмьн, ныммпэшьт
кырьтэ пырр рӣмьн. Рӣммьн паенҍт вуэйвэсь, ко̄ррк каджь со̄нэсьт: »На, ко̄ххт мэ̄нэ кыррьтҍмушш?« Рӣммьн цӣӆькэ: »Кыррьтҍмушш мэ̄нэ эйй шӣгктэнне.« Ко̄ррк каджь: »То̄нн
сӣйпэнҍ ёртътэкь?« Рӣммьн гыс са̄ррн: »Эмм кӣрркнэнч юррьтле, ко̄ххт вэлас пӯдтӭ, вусьт поаввна кэ̄ррктэ. Адтҍ кыррьтлак, ель вуаййладтҍ сӣйпэнҍ ёртътэ. Рӣммьн о̄дтӭсьт нюамэ ко̄ррка ка̄вьр э̄л. Маӈӈҍ ю̄лькэтҍ ныдтҍ шэпые, ко̄ххт е авьтма вуэр, сӣйпэнҍ кӣһчлэнтэ ёртътасьтэ. Ко̄ррк кыррьтэль, паяс пэ̄йенҍт, мӣлкнесьт пэ̄йенҍт шӯрр ва̄рь э̄л. Я со̄нн поакэ рӣммьнэ кыҏтхэ. Рӣммьн нюччкэй я вӯлькэ вэлас, гудэль ке̄дҍк. Вуаййлэдтӭ сӣйпэнҍ ёртътэ,
кэ̄рркэдҍ вусьт кокорнэһка, ю̄лльк мэ̄нэ раст. Рӣммьн вя̄йкэрт, пруткшувэ я ля̄шш, эйй лыгкэнҍт нимӣ. Ко̄ррк кырьтэ пырр рӣмьн. Рӣммьн эйй лыгкэнҍт, гӯ ёамма лӣ. Ко̄ррк вуэллгэнне кырьтэ пырр рӣмьн, кэ̄джель со̄нэсьт: »Е̄лльмэнҍ ля̄к?« Рӣммьн паенҍт вуэйв, ня̄льм а̄венҍт, эйй вуайя нимэ̄нн це̄ӆӆькэ. Ко̄ррк ся̄йвэ рӣмьн лӯз я мӣлкнесьт цӣӆькэ: »Ама, алкак вя̄л ло̄нҍтэнҍ мэнӭтҍ по̄ррэ я лоанҍт алкатҍ суэллнэ?« Тэль ко̄ррк кыррьтэль ӣжесь ла̄мьп гоаррэ, касьт ля̄йй пе̄ссь сайй мэнӭгуэйм. Моайнас пугк.

Яковлев Мыдтҍре Ла̄зэр

Популярные сообщения из этого блога

Семилетний стрелок из лука

Саам - богатырь

Гирвас - озеро