Вуэррев я ме̄һцьлэнч

Ме̄һцьлэнч вӯлькэ мя̄һца пе̄ннганҍ. Пе̄нна коавнэ вуэррев пе̄ссь сай, пе̄ссь сызьн лӣйенҍ вуэррев – алка я вуэррев – е̄ннҍ. Пе̄ннэ элькэ угкэ. Вуррев – е̄ннҍ са̄ррн алкатҍ: »Тыйй оарре
пе̄сь сызьн мӣлкнесьт, елле кӯввьлсалле!« Эфт алкне цӣӆьке: »То̄нн мӣлкнесьт луэштэдак вэлас, маӈӈьмусс вуэкьс э̄л. Кӣч че̄д пе̄зь куэһцьве, манҍтэ лӣ ме̄һцьла я пе̄ннэ.« Вуэррев
алкэнч пӯдӭ пе̄дзь ла̄ддва, касьт ля̄йй пе̄ссь я са̄ррн: »Ме̄һцьла лӣ ва̄птэгк о̄ллмэнч, пиннчак лӣ о̄дт, пысс пай вуаӆӆк, пе̄нна лӣ пӯйтэсь.« Е̄ннӭсь са̄ррн: »Тыйй, па̄ррнэ, елле палле, оарре
мӣлкнесьт. Анҍ ме̄һцьла пе̄зь куалхталл. Со̄нн вэххтэнне уййт.«


Вуэррев алка ыййдэнҍ, ӣнца аввта пӯдӭ ме̄һцьла, элькэ пе̄зь куалхтэллэ. Пе̄ннэ угк. Е̄ннӭсь са̄ррн: »Луэштэд вэлас, выльшэһтҍ, манҍтэ ме̄һцьла лӣ пуадтма.« Вуэррев – алкэнч нӣе вэлас маӈӈьмусс вуэкьс э̄л я кя̄һч: о̄ллмэнч лӣ вуэммь ка̄хтнэсьт, рӯсст пысс, вуэммь савехь, пе̄ннэ лӣ не̄лльк. Нюччк вусьт пе̄дзе, ыррашт, угк ӣннҍеннӭ. Вуэррев – алка карэ паяс пе̄зь е̄ннӭсь лӯз я са̄ррн: »Ме̄һцьленч лӣ ва̄йваш, ка̄ххтан лӣ вуэммь, рӯсст пысс, вуэммь савехь. Пе̄ннэ лӣ не̄лльк.« Е̄ннӭсь са̄ррн: »Тыйй, па̄ррнэ, оарре, елле лыгкнэгке. Тэдта ме̄һцьла мӣнэтҍ коаввн.« Ӣджь вӯлькэ о̄дзэ чӯһкас мӯрэ мӣлльтэ, коаӈк ле̄в пе̄зь, кӯз сӯгктэ я алямп. Вуэррев – е̄ннҍ
пӯдӭ моазэ я са̄ррн па̄рнэдӭсь: »Адтҍ аллькэпь мӣлкнесьт нюччкэ кя̄джьлэнне мӯрэсьт мӯрра. Мунн эвтас алка нюччкэ, э тыйй мӣлльтэ. Ныдтҍ сыйй нючкэшкудтэнҍ: вуэррев – е̄ннҍ эвтэсьт нюччк я маӈас кӣчант, ко̄ххт пуэдтӭв мӣлльтэ со̄н па̄ррнэ. Ныдтҍ вуэррев – е̄ннҍ воаеһтҍ е̄ллем сай. Адтҍ вуэррев – алка пӯдтӭнҍ о̄дт сайя. А ме̄һцьлэнч лышэ куалхталл
курас пе̄зь, а пе̄ннэ угк курас пя̄дзэ. Ныдтҍ пынньчесс вуэррев пӣсьтэ ма̄дэсьт ӣжесь алкатҍ. Моайнас пугк.

Яковлев Мыдтҍре Ла̄зэр

Популярные сообщения из этого блога

Семилетний стрелок из лука

Саам - богатырь

Гирвас - озеро