Ныгкешь баяс

Иммель энҍтэ нэ̄һкша кугкесь роаӈьк, руэнн чӯмэтҍ, чоаһпесь чуаягуэйм, штобэ эйй кӯсстъече пэ чӣллк ча̄зесьт я ра̄зе сызнҍ. Ныгкешь вуэйвэсьт ле̄в пассьтлесь па̄нҍ, тэдта лӣ паннай
кӯлль. Пугк кӯль ӣлленҍ ча̄зесьт, э ныгкешь эйй та̄һтэнч ча̄зесьт е̄лле. Иммель о̄ййкэй со̄н ча̄дза кӯрьвэгуэйм. Адтҍ ныгкешь цӯпэсьт ле̄в се̄ӈькэсь сӯррь тахта, гудэль куэрьв я нэ̄ммдуввэв »куэррьв та̄хьт«. Вя̄л ныгкешь вуэйвэсьт лӣ »ка̄ла-та̄ххьт«. Нызан, кыппьтмэнҍ нэ̄һкаш вуэйв, пыйнэв ка̄лагоанҍцэтҍ по̄ррэ.
Нӯрр мо̄ллда нимэшкӯдӭ нэ̄һкаш вуэйв я нӣлэсьт тэнн та̄хьт, ко̄нн адтҍ коадчетҍ »ка̄ла-та̄ххьт«. Кӯль эллькэнҍ Иммьле е̄ввэ, штэ ныгкешь сӣнэтҍ вайяд, штэ
ныгкешь поарряй лӣ, пукэтҍ поарр. Е̄на пукэ ваййдувэнҍт нэ̄һкшэсьт вуэсск. Танна Иммель энҍтэ вуэсскнэ чо̄гк пассьтлэсь сэ̄дткэтҍ ка̄вьр альн. Ныгкешь со̄н эйй вуэјт нӣллэ.
Тэйе сэ̄дткэгуэйм вуэсск пя̄сстай нэ̄һкшэсьт. Вя̄л Иммель ся̄дэ, штэ ма̄н ке̄жесьт пӯдтҍмэнҍ нэ̄һкшэсьт па̄нҍ кэчнэв. Ныдтҍ кӯль пе̄зсэлнэв нэ̄һкшэсьт. Э̄ввтэль пугк кӯль соарнънэнҍ. А
суэввель е̄ннэ ке̄ллсэлэнҍт кӯлетҍ Иммель баяс. Танна вуэсск вӯесьт суэввьле я лыгкэ пассьтлэсь сэ̄дткэнҍ райк суэввель ню̄ххчмэсьт. Адтҍ мыйй суэввель по̄ррмэнҍ уййнэпь суэввель ню̄ххчмэсьт тэнн райк, ко̄нн лыгкэ соннӭ вуэсскан, штобэ суэввель никуэссегенҍ эйй ке̄ллсэлче пэ. Моайнас пугк.

Яковлев Мыдтҍре Ла̄зэр

Популярные сообщения из этого блога

Семилетний стрелок из лука

Саам - богатырь

Гирвас - озеро